Plantun de Prouvènço

Pèr coumpara dos planto d'encò nostre

Airopsis tenella & Scleranthus annuus

Airopsis tenella

Poaceae Graminaceae

Nom en français : Fausse Canche délicate.

Descripcioun :
Aquesto fausso coutelino trachis, à la primo, dins li pelouso umido e li sablo sus sòu séusous. Es uno planto naneto emé uno grosso paumo (paniculo) d'ounte sorton d'espigueto redouno e lusènto un cop maduro. Cado espigueto caup dos flour emé de lemma peludo, sènso arèsto, e pu courto (1 mm) que li glumo.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 4 à 20 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Airopsis
Famiho : Poaceae
Famiho classico : Graminaceae

Ordre : Poales

Coulour de la flour :
Petalo : ges
Ø (o loungour) flour : 1,2 à 1,5 mm
Flourido : Printèms

Sòu : Si
Autour basso e auto : 0 à 600 m
Aparado : Vo
Abriéu à mai

Liò : Pelouso umido - Sablo
Estànci : Termoumediterran à Mesoumediterran
Couroulougi : Estenoumediterrano-Ouèst
Ref. sc. : Airopsis tenella (Cav.) Asch. & Graebn., 1888

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.